© Ilya Naymushin / Reuters

အေနှစ်ထဲမှာ ရွှေတန်ဖိုးတိ မြင့်တက်နိုင်ပါရေလို့ အတ်ကိုဘဲ အပေါင်းအပါများ(Echobay Partners)ကို တည်ထောင်ရေ ဗိန့်ဆ် လန်စီ(Vince Lanci)က ခန့်မှန်းထားပါရေ။

သူခန့်မှန်းရေအတိုင်းဆိုကေ ၂၀၁၈ ခုနှစ်မှာ ရွှေစျီးစွာ ၁ အောင်စကို လက်ရှိ ဒေါ်လာ ၁၃၀၀ ကနိန် ဒေါ်လာ ၁၇၀၀ ထိ ရောက်လားနိုင်ပနာ ၁ အောင်စကို ဒေါ်လာ ၄၀၀ အထိ ပိုမြင့်တက်လာနိုင်ရေလို့ ဆိုပါရေ။

ရှားပါးသတ္တု ရွှေကို ရင်းနှီးမြှပ်နှံကတ်တေ လူအများစုကတော့ခါ ကဗာ့ရွှေစျီးစွာ အနောက်နိုင်ငံတိက စျီးကွက်တိမှာ လူတိသတ်မှတ်နိန်ရေ စျီးပေါ်မှာရာ မူတည်နိန်ရေလို့ ဆိုပါရေ။

ဆွစ်ဇာလန်နိုင်ငံ ရှားပါးသတ္တု အကြံပီးအဖွဲ့(Precious Metal Advisory Switzerland)က ကလော်ဒီယို ဂြက်စ်(Claudio Grass) အဆိုအရ လင်ဒင် အိုဗာ ဒီ ကောင်တာ (London Over-the-Counter (OTC))မှာ မှတ်တမ်းတင်ထားရေ ရွှေရောင်းဝယ်ရေး ရွှေအလီးချိန်က တန်ချိန် ၁.၅ သန်း ရှိရေလို့ ဆိုပါရေ။ အမှန်တကယ် တကဗာလုံးမှာ တူးဖော်ရထားရေ ရွှေအလီးချိန်က တန်ချိန် ၁ သိန်း ၈ သောင်းရာ ရှိပါသိမ့်ရေ။

BRICS အုပ်စုထဲက တရုတ်နိုင်ငံ နန့် ရာရှားနိုင်ငံက ရွှေကို ပကတိ ရွှေသားနန့် တန်ဖိုး သတ်မှတ်ဖို့ ပြင်ဆင်နိန်ပါရေ။

အေစနစ်ရာ လက်တွိပေါ်လာဖို့ဆိုကေ လက်ရှိ ကူးသန်းရောင်းဝယ်နိန်ကတ်တေ စာရွက်ထက်က တန်ဖိုးတိ ပျက်လားပနာ၊ ရွှေကို အနောက်နိုင်ငံစျီးကွက်တိက ကိုင်တွယ်နိန်စွာတိလည်း ပျောက်လားနိုင်ပါရေ။

ယင်းပိုင်ဗျာလ် လက်ရှိရွှေစျီးစွာလည်း ကမောက်ကမ ဖြစ်လားနိုင်ပါရေ။

ရာရှားသမ္မတ ပူတင် က ရာရှားဘဏ်တိကို ရွှေစုဆောင်းထားခိုင်းနိန်ပုံကို ထောက်ကေ အနာဂတ်မှာ ရွှေစျီးနှုန်း ထိုးကျလားစရာတော့ လုံးဝ မမြင်ပါ။

မှတ်ချက် – ကိုယ့်လက်၊ ကိုယ့်ခြီနန့် လုပ်မှ ရရေ ဖေသာကို ဒါရိုက် ဝင်ငွေ(Active Income)လို့ ခေါ်ပါရေ။ လစဥ် ရနိန်ရေ လစာ၊ နိန့်တိုင်း ဆိုင်ရောင်းလို့ ဝင်နိန်ရေ ဖေသာတိစွာ ဒါရိုက် ဝင်ငွေတိရာ ဖြစ်ပါရေ။

ယင်းပိုင် မဟုတ်ဘဲ၊ တခါ ရင်းနှီးမြှပ်နှံထားစွာနန့် ယင်းဖေသာစွာ သူ့စွာသူ လည်ပတ်နိန်ပနာ၊ ယင်းက ရရေ ဝင်ငွေကို သွယ်ဝိုက် ဝင်ငွေ(Passive Income)လို့ ခေါ်ပါရေ။ သွယ်ဝိုက် ဝင်ငွေတိမှာ အိမ်၊ ဆိုင်၊ မြေ ဝယ်ပနာ ငှားထားစွာက ရနိန်ရေ ဝင်ငွေ၊ အချိန်အခါကို တွက်ချက်ပနာ ရွှေမှာ ရင်းနှီးမြှပ်နှံထားလို့ သူ့အလိုလို တန်ဖိုး တက်နိန်စွာက ရရေ ဝင်ငွေ၊ စျီးကွက်အနိန်အထားကို တွက်ချက်ပနာ အကွက်အကွင်းကောင်းတိမှာ အိမ်ခြံမြေ ဝယ်ထားလို့ တရိပ်ရိပ်တက်နိန်စွာက မြတ်နိန်ရေ ဝင်ငွေမျိုးတိ ပါဝင်နိန်ပါရေ။

အီးချမ်းရေ ဘဝကို ပိုင်ဆိုင်ချင်ကေ၊ သွယ်ဝိုက်ဝင်ငွေတိကို အများကြီး တည်ဆောက်ဖို့ လိုပါရေ။ ယင်းဝင်ငွေနန့် ကိုယ် ရပ်တည်နိုင်ဗျာလ်ဆိုကေ တခုလည်း ပူစရာ မလိုဘဲ ကိုယ် လုပ်ချင်စွာ လုပ်နိုင်ရေ ဘဝကို ရောက်ပါဗျာလ်။

LEAVE A REPLY

Please enter your comment!
Please enter your name here