အဂု ရခိုင်ပြည်ထဲမှာ အိန်တာနတ် ကောင်းကောင်း ရနိန်ဗျာလ်ဖြစ်လို့ နိုင်ငံခြားတက္ကသိုလ်တိက အဝီးသင် ဘာသာရပ်တိကို အိမ်မှာနိန်ယင်း လေ့လာသင်ယူနိုင်ပါဗျာလ်။

ယင်းအထဲမှာ ကျွန်တော် အချိန်ရတိုင်း လေ့လာဖြစ်တေ အင်္ဂလန် နိုင်ငံက တက္ကသိုလ်တခုနန့် ပညာရေး ဝန်ဆောင်မှု တခုကို မိတ်ဆက်ပီးပါမေ။ နှစ်ခုလုံးက ဖေသာ တပြားလည်း ပီးစရာ မလိုပါ။

  • The Open University စွာ အင်္ဂလန် နိုင်ငံက အကြီးဆုံး တက္ကသိုလ်တိအထဲမှာ ပါပါရေ။ အဓိက အဝီးသင်ပညာရေးကို အလေးထားပါရေ။ ယကေလည်း တချို့ ဘာသာရပ်တိကို ဧက ၄၀ ကျော်ရှိရေ တက္ကသိုလ်ဝင်းထဲမှာလည်း လားပနာ သင်ယူနိုင်ပါရေ။
  • အွင်လိုင်းက သင်ယူဖို့ဆိုကေ http://www.open.edu/openlearn/ ကိုလားပနာ ယင်းအထဲက Free courses ကို နှိပ်လိုက်စွာနန့် ဘာသာရပ်အလိုက် လေ့လာစရာ အများကြီးကို တွိပါလိမ့်မေ။ Create account လုပ်ပနာ ကိုယ်လေ့လာချင်စွာကို လေ့လာလို့ ရပါရေ။
  • ဘာသာရပ် တခု ဗြီးလားတိုင်း သင်တန်းဗြီးလားကြောင်း Certificate ကို Download လုပ်ပနာ ရယူနိုင်ပါရေ။
  • ကျွန်တော်ကတော့ Certificate လိုချင်စွာထက် ယင်း ဘာသာရပ်တိ အနှစ်သာရကိုရာ အဓိကထား လေ့လာဇီချင်ပါရေ။ အသေအချာ လေ့လာကြည့်ကေ ကကောင်း အနှစ်သာရ ရှိရေ အကြောင်းအရာတိကို သတိထားမိပါလိမ့်မေ။
  • ကဗာကျော် တက္ကသိုလ်ကြီး တခုဖြစ်တေအတွက် ယင်းက ပီးရေ Certificate စွာလည်း အလုပ် လျှောက်တေခါ အများကြီး အသုံးတည့်ပါလိမ့်မေ။

နောက်တခုက Alison ပါ။ “အရည်အသွေးမြင့် အသိပညာနန့် အလုပ်ခွင် ကျွမ်းကျင်ရေး သင်တန်းတိ အလကားပီးနိုင်ရေ ကဗာ့ ထိပ်ဆုံး အဖွဲ့အစည်း ဖြစ်လာဖို့” ဆိုစွာ Alison လားနိန်ရေ မျှော်မှန်းချက်ပါ။ (Alison’s vision is to be the world’s leading provider of free high quality knowledge and workplace skills training) နိုင်ငံပေါင်း ၁၉၅ နိုင်ငံက ကျောင်းသားပေါင်း ၁၁ သန်းလောက်က ဘာသာရပ်ပေါင်း ၁ ထောင်လောက်ကို နိန့်တိုင်း သင်ယူနိန်ကတ်ပါရေ။

  •  Alison က ပီးနိန်ရေ ဘာသာရပ်တိစွာ ကကောင်း အနှစ်သာရ ရှိပနာ၊ ဒီပလို(Diploma)ထိကို အလကား သင်ယူနိုင်ပါဗျာလ်။
  • https://alison.com ကို အယင်လားပနာ Register လုပ်ပါ။
  • https://alison.com/courses/categories ထဲမှာ ကိုယ်စိတ်ဝင်စားရေ ဘာသာရပ်ကို ရွီးပနာ လေ့လာနိုင်ပါရေ။
  • အွင်လိုင်းက Certificate ၊ Diploma လက်မှတ်တိကို PDF အဖြစ် Download လုပ်ပနာ အလကား ရယူနိုင်ပါရေ။
  • Certificate ၊ Diploma လက်မှတ် အစစ်တိကို https://alison.com/shop မှာ မှာယူလို့ ရနိုင်ပါရေ။ ဖေသာ သောင်းဂဏန်းတော့ခါ ပီးရပါဖို့။ အမှန်က ယင်းက ရရေ ဖေသာနန့် အေအဖွဲ့အစည်းကို လည်ပတ်နိုင်အောင် လုပ်နိန်စွာ ဖြစ်လို့ ယင်းလက်မှတ် အစစ်တိကို မှာယူသင့်ပါရေ။
  • ဖေသာပီးဖို့နန့် လက်မှတ်ယူဖို့ အခက်အခဲရှိကေ kwkhaing@gmail.com ကို ဆက်သွယ်ပါ။ ကျွန်တော် ကူညီပီးပါမေ။
  • Alison က Certificate ၊ Diploma ရဖို့အတွက် တက္ကသိုလ်တိမှာပိုင် အမှန်တကယ် ကြိုးစားဖို့ လိုရေဆိုစွာ သင်ကြည့်ကေ သတိထားမိပါလိမ့်မေ။ ရလာရေ လက်မှတ်စွာလည်း ကိုယ့်ဘဝအတွက် အမှန်တကယ် အဖိုးတန်ပါရေ။

ရခိုင်သားတိ ပညာကို လူများတိကို ပြဖို့ သင်ယူစွာထက်၊ ကိုယ့်စွာကို အသိပညာ တိုးတက်လာဖို့ အတွက်ရာ သင်ယူသင့်ရေဆိုစွာ သတိထားနိုင်ကတ်ပါဇီ။

LEAVE A REPLY

Please enter your comment!
Please enter your name here